ខ្លឹមសារសី្តពីការរៀបចំកិច្ចប្រជុំពិភាក្សាអំពីការត្រៀមរៀបចំគោលនយោបាយទេសចរណ៍ និងកសាងឯកសារបឋមនៃក្រុងកំពតដែលត្រៀមចុះក្នុងបញ្ជីបេតិកភណ្ឌ

ខ្លឹមសារសី្តពីការរៀបចំកិច្ចប្រជុំពិភាក្សាអំពីការត្រៀមរៀបចំគោលនយោបាយទេសចរណ៍ និងកសាងឯកសារបឋមនៃក្រុងកំពតដែលត្រៀមចុះក្នុងបញ្ជីបេតិកភណ្ឌ

ថ្ងៃពុធ ២រោច ខែភទ្របទ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃ២៦ ខែកញ្ញា ឆ្នាំ២០១៨  នៅសាលាខេត្តកំពតមានបើកកិច្ចប្រជុំស្តីពី "ការត្រៀមរៀបចំគោលនយោបាយទេសចរណ៍ និងការកសាងឯកសារបឋមនៃទីក្រុងកំពតដើម្បីចុះក្នុងបញ្ជីទីក្រុងបេតិកភណ្ឌ” ដែលរៀបចំដោយនាយកដ្ឋានសិក្សាស្រាវជ្រាវ និងគោលនយោបាយទេសចរណ៍នៃក្រសួងទេសចរណ៍ក្រោមអធិបតីភាព ឯកឧត្តម កើត ពុទ្ធវរី  នាយកវិទ្យាស្ថានជាតិទេសចរណ៍។ ក្នុងនោះដែរក៏មានការអញ្ជើញចូលរួមរបស់ លោកអគ្គនាយករង  លោក-លោកស្រី ប្រធាននាយកដ្ឋានព្រមទាំងមន្រ្តីជំនាញ មកពីគ្រប់ស្ថាប័ពាក់ព័ន្ធចំនួនប្រមាណ ៣៥០ នាក់។ ដោយទីក្រុងកំពត គឺជាទីក្រុងដែលអង្គការ UNESCO ប្រចាំព្រះរាជាណាចក្រកម្ពុជា សហការជាមួយក្រសួងវប្បធម៌ កំពុងសិក្សា និងមានបំណងដាក់ចូលក្នុងបញ្ជីទីក្រុងបេតិកភណ្ឌពិភពលោក ដែលជាសញ្ញាថ្មីមួយទៀតសម្រាប់គោលនយោបាយអភិវឌ្ឍន៍ វិស័យទេសចរណ៍ឲ្យមានភាពទាក់ទាញ និងបញ្រ្ជាបការយល់ដឹងអំពីការដាក់ទីក្រុងក្នុងបញ្ជីបេតិកភណ្ឌ ជាអត្ថប្រយោជន៍ និងស្ទង់មតិអំពីការត្រៀមលក្ខណៈដើម្បីចុះទីក្រុងកំពតក្នុងបញ្ជីបេតិកភណ្ឌពិភពលោក។

ឯកឧត្តម  នាយកវិទ្យាស្ថានជាតិទេសចរណ៍ បានមានប្រសាសន៍ ថាអនុលោមតាមផែនការ និងអនុសាសន៍របស់ ឯកឧត្តមបណ្ឌិត   ថោង ខុន  រដ្ឋមន្រី្តក្រសួងទេសចរណ៍​  "ជាចក្ខុវិស័យ នៅឆ្នាំ២០២០ កម្ពុជារំពឹងទទួលបានទេសចរអន្តរជាតិ ៧លាននាក់ បង្កើតការងារផ្ទាល់ប្រមាណ ១លាននាក់ហើយនៅឆ្នាំ២០២៥ កម្ពុជាអាចនឹងទទួលបានភ្ញៀវទេសចរ ១០លាននាក់ បង្កើតការងារផ្ទាល់ប្រមាណ ១.២លាននាក់ ហើយនៅឆ្នាំ២០៣០ អាចនឹងទទួលបាន ១៥លាននាក់ បង្កើតការងារផ្ទាល់ប្រមាណ ២លាននាក់ " ។ ហើយនៅឆ្នាំ២០១៧ កម្ពុជាទទួលបានភ្ញៀវទេសចរអន្តរជាតិជាង ៥.៦លាននាក់ កើនឡើង ១១.៨% និងទទួលបានចំណូលជាង ៣,៦០០លានដុល្លារ បានរួមចំណែកប្រមាណ ១២% នៃផលិតផលក្នុងស្រុកសរុប និងផ្តល់ឱកាសការងារដោយផ្ទាល់ជាង៦៥ម៉ឺននាក់ និងដោយប្រយោលរាប់សិបម៉ឺននាក់បន្ថែមទៀត។ រយៈពេល ៧ខែ ក្នុងឆ្នាំ២០១៨នេះ កម្ពុជាទទួលបានភ្ញៀវទេសចរអន្តរជាតិប្រមាណ ៣.៥លាននាក់ កើនឡើង ១១.១%ហើយជាការរំពឹងទុកពេញមួយឆ្នាំ២០១៨ កម្ពុជានឹងទទួលបានទេសចរ ៦.២លាននាក់។ ដោយឡែក តំបន់ឆ្នេរនៅឆ្នាំ២០១៧ ទទួលបានភ្ញៀវទេសចរអន្តរជាតិប្រមាណ ៦០០ពាន់នាក់ កើនឡើង ៣៤.៥%។ តាមការព្យាករណ៍នៅឆ្នាំ២០២០ កម្ពុជានឹងទទួលភ្ញៀវទេសចរ អន្តរជាតិ ៧លាននាក់ជាមួយនឹងចំណូលប្រមាណជាង ៥ពាន់ លាន ដុល្លារ និងបង្កើតការងារដោយផ្ទាល់ប្រមាណ ១ លាននាក់ និងការងារដោយប្រយោលរាប់លាននាក់បន្ថែមទៀត។