ក្តីសង្ឃឹមដ៏មុតមាំ

គណបក្សខ្មែររួបរួមជាតិ តែមួយគត់គឺជាក្តីសង្ឃឹមដ៏មុតមាំ  របស់បងប្អូន ប្រជាជនកម្ពុជាយើង នាពេលបោះឆ្នោត ឃុំ/សង្កាត់ ឆ្នាំ ២០១៧ខាងមុខនេះ។ ហេតុអ្វីបានខ្ញុំបាទ ហ៊ានថា គណបក្សខ្មែររួបរួមជាតិ តែមួយគត់គឺជាក្តីសង្ឃឹមដ៏មុតមាំ  របស់បងប្អូន ប្រជាជនកម្ពុជាយើង?  ដើម្បីបង្ហាញពីប្រវត្ត សាវតារ របស់ឥស្សជន ថ្នាក់ដឹកនាំ គណបក្សខ្មែររួបរួមជាតិ ដែលបានបូជាឈាមស្រស់ សាច់ស្រស់ ដើម្បីការពារជាតិមាតុភូមិខ្មែរយើង ប្រចាំនៅទិសពាយព្យ   ប្រឆាំងនឹងពួកបរទេសដែលមានមហិច្ឆិតា ចិញ្ចឹមចិត្តចង់លេបត្របាក់ប្រទេសកម្ពុជាយើង ។      មានតែគណបក្សខ្មែររួបរួមជាតិមួយប៉ុណ្ណោះ   ដែលមានអតីតមេទ័ពជាប្រធានបក្ស     យើងឃើញថា ឯកឧត្តម ញឹក ប៊ុនឆៃ ជាប្រមុខ  អ្នកស្នេហាជាតិដ៏ពិតប្រាកដ ។

ពិត​ណាស់​ ក្រុមអ្នកតស៊ូដង្ហែព្រះករុណា សម្ដេចព្រះនរោត្តម សីហនុ  ព្រះរាជស្ថាបនិកនៃចលនាតស៊ូទាមទារឯករាជ្យ និងអធិបតេយ្យភាពជាប្រវត្តិសាស្ត្រជាលើកទី២ ចាប់តាំងពីដើមទស្សវត្សឆ្នាំ១៩៨០ បានផ្ដួចផ្ដើមបង្កើតគណបក្សខ្មែររួបរួមជាតិ។ សមាជសកល គណបក្សខ្មែររួបរួមជាតិ ប្រារព្វឡើងកាលពីថ្ងៃទី២៦ ខែកុម្ភៈ ឆ្នាំ២០១៦ នៅសង្កាត់ជ្រោយចង្វារ រាជធានីភ្នំពេញ   ក្រោមអធិបតីភាពក្រុមប្រឹក្សាជាតិ១៦០០នាក់ ហើយបានសម្រេចជ្រើសរើសសហជីវិន ញឹក ប៊ុនឆៃ ជាប្រធានគណបក្ស សហជីវិន ទា ចំរ៉ាត់ ជាប្រធានកិត្តិយសគណបក្ស និងសហជីវិន ខាន់ សាវឿន ជាអនុប្រធានគណបក្ស។

គណបក្សខ្មែររួបរួមជាតិ បង្កើតឡើងក្នុងគោលដៅបើកចំហឱ្យមានការចូលរួមរបស់ខ្មែរគ្រប់និន្នាការនយោបាយ គ្រប់មជ្ឈដ្ឋាន និងគ្រប់អាជីព ដោយមិនមានការរើសអើងភេទ ពណ៌សម្បុរ ពូជសាសន៍ ក្នុងមហាគ្រួសារជាតិ កសាងសាមគ្គី និងឯកភាពជាតិរឹងមាំ ដើម្បីចូលរួមដោះស្រាយដោយប្រសិទ្ធភាពខ្ពស់រាល់បញ្ហាធំៗ។ បញ្ហាសំខាន់ដែលជាអាយុជីវិតជាតិទាំងនោះ គ្មានក្រុម ឬគណបក្សនយោបាយណាមួយ អាចដោះស្រាយផ្ដាច់មុខតែឯងបានដោយជោគជ័យនោះទេ ហើយក៏មិនត្រូវបណ្ដែតបណ្ដោយឱ្យអូសបន្លាយតទៅទៀត ដែលគ្មានអ្វីក្រៅពីនាំហាយនភាព ជាយថាហេតុក្នុងសង្គមខ្មែរយើងជាថ្មីម្ដងទៀត។

យើងទាំងអស់គ្នាពិតជាមានសំណាងណាស់ ដែលមានថ្នាក់ដឹកនាំ ជាវារៈជនគំរូ ទទន្ទឹមនឹងនេះដែរ យើងទាំងអស់គ្នា ជាសមាជិក សមាជិកា ត្រូវមានការចូលរួម សាមគ្គីឱ្យកាន់មានភាពផុលផុស ហើយត្រូវមានតួនាទី បង្ហាត់បង្រៀន បណ្តុះបណ្តាយ យុវជន - យុវនារី ឱ្យយយល់នូវ៖

      គោលជំហ៊រ របស់បក្ស ខរជ ៖ ឯករាជ្យ សន្តិភាព យុត្តិធម៌  និង

      គុណសម្បត្តិចំនួន ៣  ដែលជា គោលការណ៍ដឹកនាំគណបក្សខ្មែររួបរួមជាតិ

១.       សមាជិក សមាជិការ សកម្មជន គណបក្សជាម្ចាស់គណបក្សខ្មែររួបរួមជាតិ។

២.     គណបក្សខ្មែររួបរួមជាតិ តម្កល់ផលប្រយោជន៍ប្រទេសជាតិ ប្រជាពលរដ្ឋធំជាងផល 

          ប្រយោជន៍ផ្ទាល់ខ្លួន និងបក្ខពួក។

៣.     ការដឹកនាំ គ្រប់គ្រងគណបក្សតាមបែបលទ្ធិប្រជាធិបតេយ្យ      គ្មានបក្ខពួកនិយមគ្រួសារ

          និយម និងគ្មានអំពើពុករលួយ។

លើស​ពី​នេះ​ទៅ​ទៀត​ បងប្អូនសមាជិក សមាជិកា ត្រូវសិក្សា និងស្វែងយល់ឱ្យបានច្បាស់ នូវគោលនយោបាយមូលដ្ឋាន ៩​ចំណុច នៃគណបក្សខ្មែររួបរួមជាតិ ដែលមានសារៈប្រយោជន៍សំខាន់ណាស់ នៅក្នុង​សង្គម​លទ្ធិ​ប្រជា​ធិប​តេយ្យ​ ពេញ​លេញ​ រួមមាន៖  ភូមិ-ឃុំ សុខក្សេមក្សាន្ត ភូមិ-ឃុំ ស្អាតស្អំ ភូមិ-ឃុំ យុត្តិធម៌ ភូមិ-ឃុំ រុងរឿង ភូមិ-ឃុំ សុខដម្យ ភូមិ-ឃុំ បៃតង  ភូមិ-ឃុំ គ្មានការគៀបសង្កត់  ភូមិ-ឃុំ មានគុណភាព ភូមិ-ឃុំ អភិវឌ្ឍន៍។

ម្យ៉ាងវិញទៀត អ្វីដែលខ្ញុំចង់លើកឡើងនៅពេលនេះ គឺជាការផ្ដាំផ្ញើដល់ ជាពិសេស ក្មួយៗ​យុវជន-យុវនារី  ដែលជាទំពាំងស្នងឫស្សី និងជាសរសរទ្រុង ដ៏រឹងមាំសម្រាប់ ប្រទេសជាតិ នាពេលនាអនាគត សូមចេះរួបរួមសាមគ្គីគ្នា ក្នុងការគិត ដោះស្រាយគ្រប់បញ្ហា  និងរស់នៅជាមួយគ្នា ដោយសុខសន្តិភាព៕